سنگ مر مر

 از قلم اسامہ رحمن مانی 

قسط نمبر2

عظمی بیگم فیصل کے ہمراہ اندر چلی گئیں۔۔۔۔۔۔۔۔۔۔۔

تقریباً آدھا گھنٹہ فیصل موبائل استعمال کرتا رہا۔۔۔۔۔پھر جا کر اسے نیند آئی۔۔۔۔

•••••••••••••••••••••••••••••••••••••••

ایمان۔۔۔۔ساجدہ بیگم نے آواز دی۔۔۔۔

جی امی۔۔۔۔ایمان نے جواب دیا۔۔۔۔۔وہ ابھی فجر کی نماز پڑھ کر فارغ ہوئی تھی۔۔۔۔۔

حسین صبح کے آغاز میں اس کا دوگنا حسین چہرہ کسی گلاب کی پنکھڑی کی مانند حجاب میں لپٹا تھا۔۔۔۔

تمہارا رزلٹ کب آنا ہے تیسرے سمسٹر کا۔۔۔۔۔۔

امی جان اگلے مہینے آئے گا۔۔۔۔۔کیوں کیا ہوا۔۔۔۔۔

ہمم۔۔۔آؤ بیٹھو۔۔۔انہوں نے پاس بیٹھنے کا اشارہ کیا۔۔۔۔۔۔۔

رضیہ خالہ کا فون آیا تھا کل پھر۔۔۔۔رشتے کے لیے۔۔۔۔۔

یہ سن کر ایمان نے سر جھکا لیا۔۔۔۔

تم جانتی ہو کہ عمیر تمہیں چاہتا ہے۔۔۔۔ان کی خواہش ہے کہ اب عمیر سے تمہاری شادی ہو جائے۔۔۔۔

لیکن امی۔۔۔۔اس نے کچھ کہنا چاہا۔۔۔

تم شادی کے بعد بھی پڑھائی جاری رکھ سکتی ہو۔۔۔۔۔وہ تمہیں نہیں روکے گا۔۔۔۔۔

امی۔۔۔۔اس طرح نہیں ہو سکتی نا پڑھائی۔۔۔۔آپ سمجھنے کی کوشش کریں۔۔۔۔۔اور ویسے بھی میں وہاں۔۔۔۔۔وہ اتنا کہہ کر چپ ہو گئی۔۔۔۔۔۔۔

آخر کیا کمی ہے عمیر میں۔۔۔اور اس کی کمائی بھی تم خود جانتی ہو تمہارے ابا کی سال بھر کی کمائی کے برابر تو اس کی ایک مہینے کی تنخواہ ہے۔۔۔۔شکل و صورت کا بھی اچھا ہے۔۔۔۔

امی۔۔۔وہ اپنی ضد کا بہت پکا ہے کسی کی بات نہیں سنتا اور غصے کا کتنا تیز ہے یہ بھی آپ جانتی ہیں۔۔۔۔

مجھے نہیں بس۔۔۔۔مجھے۔۔۔ڈر لگتا ہے ایسے لوگوں سے۔۔۔۔۔وہ سر جھٹک کر بولی۔۔۔

اوہ۔۔۔تم تو یونہی چھوٹی چھوٹی باتوں کو لے کر بیٹھ گئی ہو۔۔۔۔۔خامیاں خوبیاں تو ہر کسی میں ہوتی ہیں نا۔۔۔۔پر وہ دیکھا بھالا لڑکا ہے۔۔۔۔تمہاری اپنی خالہ کا بیٹا ہے۔۔۔۔کوئی اور مسئلہ بھی نہیں ہو گا۔۔۔۔۔

انہوں نے ایمان کو قائل کرنا چاہا۔۔۔۔

ایمان نے رخ پھیر لیا۔۔۔۔۔اسے اس رشتے سے یہی مسئلہ تھا کہ وہ عمیر کی عادتوں سے خوب واقف تھی۔۔۔۔وہ جانتی تھی کہ عمیر جب غصہ کرے تو کوئی چیز اس کے سامنے معنی نہیں رکھتی۔۔۔۔۔اگر کوئی کام کرنے کی ٹھان لے تو کوئی اسے روک نہیں سکتا چاہے وہ کام غلط ہو یا صحیح اور کسی بات سے انکاری ہو جائے تو ساری دنیا مل کے بھی اسے اس پر راضی نہیں کر سکتی۔۔۔۔پھر عمیر کے کچھ اور خصائل بھی ایسے تھے جو ایمان کے اس رشتہ سے انکار کرنے کی وجہ بن سکتی تھیں جن میں سے ایک یہ بھی تھی کہ رات گئے تک عمیر بے وجہ گھر سے باہر رہتا تھا۔۔۔۔۔۔۔

 دوسری جانب ایمان اس سے یکساں مختلف تھی وہ صوم صلوٰۃ کی پابند لڑکی تھی۔۔۔اور اکثر تو تہجد کے نوافل بھی ادا کیا کرتی تھی۔۔۔۔۔نیک و پردہ دار تھی۔۔۔۔لہذا وہ اپنے لیے اپنا سا ہی کوئی ہمسفر چاہتی تھی۔۔۔۔کیا ہوا آپی۔۔۔۔ایمان کو پریشان دیکھ کر نور نے پوچھا۔۔۔کچھ نہیں۔۔۔

بتاؤ نا آپی۔۔۔کیا ہوا؟ کیوں اداس ہو؟ زارا آپی سے کوئی جھگڑا ہو گیا ہے؟

اوہ اچھا۔۔۔۔آج جاتے ہی آپ دونوں کی صلح کرا دوں گی۔۔۔۔اب چلیں ناشتے کے لیے۔۔۔ دیر ہو جائے گی کالج سے۔۔۔۔۔نور یہ کہتے ہوئے اٹھنے لگی

رکو نور۔۔۔۔ایمان نے ہاتھ سے اسے روکا۔۔۔۔

اچھا پھر۔۔۔۔؟ نور نے واپس بیٹھتے ہوئے دوبارہ پوچھا۔۔۔۔

رضیہ خالہ کا فون آیا تھا امی کو۔۔۔۔وہی رشتے کی بات کرنے کے لیے۔۔۔۔

اوہ پھر ۔؟ ایمان کے بتانے پر نور بھی پریشان سی ہو گئی۔۔۔وہ اپنی بہن کے دل کا حال جانتی تھی۔۔۔۔۔

اب پھر کیا کریں۔۔۔۔آپ صاف انکار کر دیں نا۔۔۔۔۔۔

اتنی بھی ہمت نہیں ہے مجھ میں۔۔۔۔۔ اس نے نور کی طرف دیکھتے ہوئے کہا۔۔۔۔۔

اللہ بہتر کرے گا۔۔۔۔انشاءاللہ۔۔۔۔کچھ نہیں ہو گا۔۔۔۔اب اٹھیں۔۔۔۔ابا آنے والے ہوں گے مسجد سے واپس۔۔۔۔۔

•••••••••••••••••••••••••••••••••••••••

فیصل۔۔۔۔اٹھ جاؤ بیٹا۔۔۔۔دن چڑھ گیا ہے 11 بجنے والے ہیں۔۔۔۔

عظمی بیگم کی آواز سن کر فیصل ہڑبڑا کر اٹھا۔۔۔۔وہ ہوٹل جانے کے لیے 10 بجے نکلتا تھا۔۔۔۔

اور اس کے لیے 9 بجے کا الارم لگاتا تھا۔۔۔۔

اس نے سوچا کہ آج الارم کیوں نہیں بجا۔۔۔۔مگر جب ٹائم دیکھا تو پتہ چلا کہ ابھی 9 بجنے میں بھی پندرہ منٹ باقی تھے۔۔۔۔۔۔۔۔۔۔۔۔۔۔۔۔۔۔۔

خیر وہ فریش ہو کر ناشتے کے لیے نیچے آیا۔۔۔۔تو عظمی بیگم کسی کتاب کا مطالعہ کر رہی تھیں۔۔۔امی آپ بھی ناشتہ کریں نا۔۔۔اس نے کہا۔۔۔

میں صبح کر تو لیتی ہوں تمہارے ابو کے ساتھ ہی بیٹا۔۔۔

تمہاری طرح دس دس بجے تھوڑی ناشتہ ہوتا ہے ہمارا۔۔۔

امی ایک بات تو بتائیں۔۔۔۔چلیں ابو تو جلدی سو جاتے ہیں۔۔۔مگر آپ تو میرے آنے کے بعد سوتی ہیں۔۔۔۔پھر آپ اتنی جلدی کیسے اٹھ جاتی ہیں فجر کے وقت؟

محبت بیٹا۔۔۔اس کی محبت جگا ہی دیتی ہے۔۔۔۔انہوں نے جواب دیا۔۔۔

فیصل نے کچھ نہ سمجھتے ہوئے سر ہلایا تو وہ پھر گویا ہوئیں۔۔۔۔

جس نے ہمیں اتنی نعمتیں دیں۔۔۔اتنے احسانات کیے ہم پر۔۔۔کیا ہمارا فرض نہیں بنتا کہ ہم اس کا شکر ادا کریں۔۔۔بس یہ احساس جب پیدا ہو جائے نا تو پھر وہ خود ہی وقت پر جگاتا ہے بیٹا۔۔۔

لیکن امی میں بھی تو سوچتا ہوں کہ اٹھوں گا کوشش بھی کرتا ہوں۔۔۔مجھ سے تو نہیں اٹھا جاتا۔۔۔الارم بھی لگا لوں تو بند کر کے پھر سو جاتا ہوں۔۔۔فیصل بولا۔۔۔

اسی لیے کے ابھی تم نے محبت نہیں کی۔۔۔اس سے محبت کرو۔۔۔وہ اپنے ان بندوں کے بہت قریب ہو جاتا ہے جو اس سے محبت کرتے ہیں۔۔۔

فیصل یہ سن کر مسکرانے لگا۔۔۔

امی میں آج جلدی گھر آ جاؤں گا دن میں۔۔۔

مجھے کامران کی طرف جانا ہے۔۔۔اس نے بلایا ہے۔۔۔فیصل نے چائے کا آخری گھونٹ پی کر کپ میز پر رکھتے ہوئے بتایا۔۔۔ 

اچھا کب تک واپس آ جاؤ گے؟۔۔۔

رات کو دیر سے ہو گی واپسی۔۔۔لیکن پلیز آپ آج انتظار مت کیجیے گا میرا۔۔۔مجھے کافی دیر ہو جائے گی۔۔۔

•••••••••••••••••••••••••••••••••••••••

ساری تیاریاں مکمل ہیں کامران؟ کامران کے والد نے کمرے میں داخل ہوتے ہوئے پوچھا۔۔۔

جی ڈیڈ۔۔۔سب تیاریاں مکمل ہو گئیں ہیں تقریباً۔۔۔بس وہ لائیٹنگ کا کام رہتا ہے تھوڑا سا۔۔۔ابھی ہو جائے گا تھوڑی دیر میں۔۔۔

چلو گڈ۔۔۔پارٹی بیسٹ ہونی چاہیے۔۔۔

انہوں نے انگوٹھے کے اشارے سے کہا۔۔۔

کیوں نہیں ہو گی پاپا۔۔۔بالکل اے ون ہو گی۔۔۔کامران جوش سے بولا۔۔۔

•••••••••••••••••••••••••••••••••••••••

کیا ہوا کیوں اداس ہو۔۔۔زارا نے کلاس میں داخل ہوتے ہی ایمان کی پریشانی بھانپ لی۔۔۔۔ایمان خاموش رہی۔۔۔

بتاؤ نا کیا ہوا ہے۔۔۔اس نے پھر پوچھا۔۔۔۔

وہ عمیر۔۔۔کل دوبارہ بات کی تھی خالہ نے امی سے۔۔۔یار میں شادی نہیں کرنا چاہتی اس سے مگر امی نہیں مان رہیں۔۔۔ایمان نے اداسی کی وجہ بتلائی۔۔۔

اوہ۔۔۔یہ بات ہے۔۔۔یہ تو واقعی پریشان کن ہے۔۔۔مگر تمہارا ابھی کہیں اور سے رشتہ بھی تو نہیں آیا۔۔۔۔۔۔لیکن تم تو اتنی نیک ہو۔۔۔نماز روزے والی ہو۔۔۔تم اللّٰہ سے دعا کرو نا۔۔۔سب ٹھیک ہو جائے گا۔۔۔

نیک ہونا ضروری نہیں ہے دعا کی قبولیت کے لیے زارا۔۔۔ایمان اس کی جانب دیکھتے ہوئے بولی۔۔۔

کیا مطلب۔۔۔زارا نے حیرت سے پوچھا۔۔۔۔۔اس کا یہ خیال تھا کہ جو جتنا نیک ہو گا اتنی ہی اس کی دعا جلدی قبول ہو گی۔۔۔۔۔

خلوص نیت اور یقین کامل۔۔۔اس بارایمان نے سامنے دیکھتے ہوئے کہا تو زارا آنکھوں میں حیرت لیے اسے دیکھ رہی تھی۔۔۔۔معلوم ہو رہا تھا کہ وہ بمشکل آدھی بات ہی سمجھی ہے۔۔۔۔

ایمان اس کا وہ عجیب سا چہرہ دیکھ کر مسکرا دی۔۔۔

•••••••••••••••••••••••••••••••••••••••

حمزہ میں واپس جا رہا ہوں۔۔۔آج مجھے ایک فرینڈ کی طرف جانا ہے۔۔۔دن دو بجے فیصل نے حمزہ کو آگاہ کیا۔۔۔

اچھا۔۔۔کہاں جانا ہے ویسے۔۔۔حمزہ نے پوچھا۔۔۔

واہ کینٹ۔۔۔فیصل جواب دیتے ہوئے باہر نکل گیا۔۔۔

جب وہ اپنی گلی کے قریب پہنچا تو ایمان اور نور اپنے ابا کے ساتھ سامنے سے آتی دکھائی دیں۔۔۔آج فیصل نے ان کو پہلی بار دیکھا تھا۔۔۔۔۔۔انہیں شاید ساتھ والی گلی میں مڑنا تھا۔۔۔

فیصل نے ایمان کو دیکھا تو دیکھتا ہی چلا گیا۔۔۔۔اس کے چہرے پر تو نقاب تھا مگر فیصل کی نظر اس کی آنکھوں پر جمی تھی۔۔۔وہ کسی بھی لڑکی سے کبھی ایسا متاثر نہ ہوا تھا۔۔۔۔وہ اسے دیکھتا ہی چلا گیا مگر ایمان نے ایک نظر بھی اس کی جانب نہ اٹھائی۔۔۔

اسے تو شاید معلوم بھی نہ تھا کہ کوئی اس کی جانب دیکھ رہا ہے۔۔۔ہاں ایک مرتبہ نور نے ضرور فیصل پر سرسری سی نگاہ ڈالی تھی۔۔۔

ان کے دور جانے پر اس نے بھی گاڑی کی رفتار تھوڑی بڑھا دی۔۔۔۔۔۔

•••••••••••••••••••••••••••••••••••••••

گھنٹہ بھر تیاری کرنے بعد اب فیصل کامران کے گھر جانے کے لیے نکل رہا تھا۔۔۔۔۔۔

راستے میں بھی اسکا ذہن انہی خوبصورت آنکھوں کو بار بار سوچ رہا تھا جو اس نے گھر آتے ہوئے دیکھی تھیں۔۔۔۔اگرچہ ایمان نے ایک مرتبہ بھی فیصل کو نہ دیکھا تھا مگر شاید فیصل کو ایمان کی یہی ادا پسند آ گئی تھی جب ہی وہ اس کے بارے میں سوچ رہا تھا۔۔۔

•••••••••••••••••••••••••••••••••••••••

آؤ میرے دوست۔۔۔کیسے ہو۔۔۔

وہ جیسے ہی کامران کے گھر پہنچا تو اس نے فیصل کا پر جوش استقبال کیا۔۔۔

بالکل ٹھیک۔۔۔تو کیسا ہے؟۔۔۔

میں تمہارے سامنے۔۔۔ایک دم فرسٹ کلاس۔۔۔خوشی کامران کے انگ انگ سے پھوٹ رہی تھی۔۔۔جسے فیصل نے بھی جان لیا تھا۔۔۔

چلو آؤ اندر آؤ۔۔۔۔سرپرائز تمہارا منتظر ہے۔۔۔کامران نے کہا تو فیصل اس کے ساتھ لان میں پہنچا۔۔۔۔

آرزو تم۔۔۔۔۔؟؟؟

وہاں موجود لڑکی کو دیکھ کر فیصل کو زبردست حیرت کا جھٹکا لگا۔۔۔۔۔۔